Ерөнхий сайд аа, С.Зоригийг хөнөөсөн хэргийг нуун дарагдуулсан хүн нь Х.Баттулга гэсэн үг үү

         Ерөнхий сайд Л.Оюун-Эрдэнэ хов базав. Монголын 14 телевизээр 15 удаагийн давтамжтайгаар гаргаж эхэлсэн “Улаанбаатараас ярьж байна” нэвтрүүлгийнх нь гол сэдэв экс Ерөнхийлөгч Ц.Элбэгдорж, “Эрдэнэт үйлдвэр”-ийн 49 хувь, С.Зоригийг хөнөөсөн хэрэг. Товчхондоо, нөгөө л эл дол болсон сэдвүүд. Гэвч УИХ-ын 2024 оны сонгууль болохоос хэдхэн сарын өмнө МАН-ын дарга, Ерөнхий сайдын хувьд өгсөн энэхүү ярилцлагыг олон нийт анхааралтай сонсож байна. Ц.Элбэгдорж өөрийг нь онцолж ярьсан энэхүү ярилцлагынх нь эсрэг “Өөртөө дурласан жаалын тархин дотор түрээсгүйгээр амьдарч байна” гэсэн утгатай хариу барив. Гэвч Л.Оюун-Эрдэнэ яагаад экс Ерөнхийлөгчийг онилох болов...?

   Ерөнхий сайд Л.Оюун-Эрдэнэ Ц.Элбэгдорж, Х.Баттулга нартай холбоотой ноцтой зүйл ярив. “Ц.Элбэгдорж Х.Баттулгад тамгаа гардуулахдаа “С.Зоригийг хөнөөсөн хэргийг битгий сөхөөрэй” гэж хэлсэн” гэж. Үндэсний аюулгүй байдлын зөвлөлийн гишүүн, Үндсэн хуулиар үнэмлэхүй эрх мэдэлтэй болсон Ерөнхий сайд Л.Оюун-Эрдэнийн хувьд энэ бол хариуцлагатай мэдэгдэл. Өндөр түвшний мэдээлэлтэй Засгийн газрын тэргүүний үг бол үг. Дээрх ярианаас харвал, Ц.Элбэгдорж, Х.Баттулга нар С.Зоригийг хөнөөсөн хэргийг хав дарахаар хуйвалдсан болж таарах нь. Хуйвалдаад зогсохгүй Х.Баттулга Монгол Улсын Ерөнхийлөгчөөр ажиллах үедээ төр, нийгмийн зүтгэлтэн С.Зоригийг хөнөөсөн хэргийг Ц.Элбэгдоржийн захисан ёсоор хав дарж, нуун дарагдуулсан уу гэдэг асуулт гарч ирлээ. Хэрэв Ерөнхий сайд Л.Оюун-Эрдэнийн ярьсан нь үнэн бол хүн амины онц ноцтой гэмт хэргийг нуун дарагдуулсан этгээд нь Ерөнхийлөгч Х.Баттулга болж таарав уу. Л.Оюун-Эрдэнэ Улаанбаатараас улаан цайм ингээд ярьчихлаа шүү дээ. Тэгэхээр Ц.Элбэгдорж, Х.Баттулга хоёрыг яг одоо нүүрэлдүүлье, Ерөнхий сайд аа. Эрх баригч хүчний дарга, Ерөнхий сайдын мэдэлд цагдаа, тагнуул, АТГ бий. С.Зоригийг хөнөөсөн хэргийг үгсэн хуйвалдаж нуун дарагдуулсан гэх үндэслэлээр экс Ерөнхийлөгч нарыг шалгуулъя. “Хүн нь байвал хэрэг нь олддог” гэдэгчлэн Ерөнхий сайдын нэр дурдсан хоёр хүн байна. Өөрөөр хэлбэл, эзэд нь байна. Эзэд нь байхад нь хууль нь олдохгүй болох учиргүй, Ерөнхий сайд аа. “Х.Баттулга Ерөнхийлөгч байхдаа Ц.Элбэгдоржийн захиас, зааврын дагуу С.Зоригийг хөнөөсөн хэргийг нуун дарагдуулсан уу” гэдгийг шалгуулах нь Ц.Элбэгдоржийн сошиал “элэглэл”-д өгөх гоё хариу бус уу. Түүнээс гадна Ц.Нямдорж Хууль зүй, дотоод хэргийн сайдаар томилогдохдоо “Ажлаа авсан даруйдаа С.Зоригийг хөнөөсөн хэргийн захиалагчийг зарлана” гэж байсан. Гэвч зарлаагүй. Ерөнхий сайд Л.Оюун-Эрдэнэ эрх баригч МАН-ыг сонгуульд анх удаа удирдаж оролцох гэж байна. Тэгэхээр Ц.Нямдоржийн амлаж байсанчлан С.Зоригийг хөнөөсөн хэргийн захиалагчийг сонгуулиас өмнө зарлачих.

                                                                                                                                                     Д.Анар