Лу.Гантөмөр: Р.Базараа гэдэг хүнийг огт танихгүй. МАН-ынхан “Гөлөг төөрүүлж” байна

       УИХ-ын сонгуулийн өмнө АТГ, цагдаагийнхан улстөрчид, тэдний хамаарал бүхий хүмүүс, аль эсвэл бизнесийн салбарынхныг саатуулдаг үзэгдэл уламжлал болсон гэхэд хилсдэхгүй. Үүний нэг тод жишээ нь экс Ерөнхийлөгч Н.Энхбаярыг 2012 онд “оймсдож” байсан явдал юм. Харин энэ удаад “Алтайн хүдэр” ХХК-ийн захирал, олны дунд “Баян” Р.Базараа гэж нэрлэгддэг хүнийг Эрүүгийн цагдаагийн албаныхан хойшлуулшгүй ажиллагаагаар саатууллаа. Зарим хэвлэл болон сошиалд “Р.Базараа нь Нарийнсухайтын уурхайгаас борлуулж нуусан нүүрсний 20 сая ам.долларын орлогыг Сингапурт бүртгэлтэй компани руу шилжүүлж ОХУ-аар дамжуулан Монголд оруулж ирсэн байж болзошгүй. Р.Базараагийн холбогдсон хэрэгт АН-ын дарга Лу.Гантөмөр, дэд дарга С.Баярцогт, экс Ерөнхийлөгч Ц.Элбэгдорж, УИХ-ын гишүүн асан Н.Номтойбаяр нарын нэр бүхий улстөрчид холбогдож болзошгүй байна. Р.Базарааг улстөрчдийн сонгуулийг санхүүжүүлэх гэж байсан гэх үндэслэлээр бас шалгаж байна” гэдэг мэдээлэл түгж байна. АН-ын дарга Лу.Гантөмөрөөс энэ талаар тодруулахад “Р.Базараа гэх хүнийг би огт танихгүй, уулзаж ч байгаагүй. МАН-ынхан өөрсдийнхөө зодоонд миний нэрийг ашиглаж байна. Хүмүүсийн хэлдэгчлэн “Гөлөг төөрүүлэх” арга шүү дээ. МАН-ын зарим дарга хэрэг явдлыг өөрөөсөө холдуулахын тулд миний эсрэг гүтгэлэг болгон ашиглаж байна. Би сая С.Баярцогтоос асуулаа. С.Баярцогт “Р.Базараа гэдэг хүнийг танихгүй” гэж байна. Одоо хүмүүс хэрсүү болсон. Эрх баригчдын сонгуулийн өмнөх зодоон гэдгийг гадарлаж л байгаа шүү дээ. АН энэ талаар мэдэгдэл гаргана” гэлээ.   

                                                                                                                                               Ж.Долгион