Хуулийн төслүүдийн эцсийн хэлэлцүүлгийг явуулж, эцэслэн батлах бэлтгэл хангуулахаар Байнгын хороодод шилжүүллээ

Монгол Улсын Их Хурлын чуулганы өнөөдөр (2026.06.12)-ийн үдээс өмнөх нэгдсэн хуралдаанаар анхны хэлэлцүүлгийн явуулсан Татварын ерөнхий хуульд нэмэлт, өөрчлөлт оруулах тухай хуулийн, Засгийн газар болон Улсын Их Хурлын гишүүн П.Сайнзориг нарын өргөн мэдүүлсэн Аж ахуйн нэгжийн орлогын албан татварын тухай хуульд нэмэлт, өөрчлөлт оруулах тухай хуулийн төслүүд, Нэмэгдсэн өртгийн албан татварын тухай хуульд нэмэлт, өөрчлөлт оруулах тухай болон хамт өргөн мэдүүлсэн хуулийн төслүүд, Улсын Их Хурлын гишүүн Ж.Баярмаа нарын болон Засгийн газраас өргөн мэдүүлсэн Хувь хүний орлогын албан татварын тухай хуульд нэмэлт, өөрчлөлт оруулах тухай хуулийн төслийн нийт 32 зарчмын зөрүүтэй саналын томьёоллоор үдээс хойно санал хураалт явууллаа. Зарчмын зөрүүтэй санал бүрээр нэг бүрчлэн санал хураалт явуулж, Улсын Их Хурлын чуулганы нэгдсэн хуралдаанд оролцсон гишүүдийн олонх дэмжсэнээр хуулийн төслүүдийг эцсийн хэлэлцүүлэгт бэлтгүүлэхээр Төсвийн байнгын хороонд шилжүүлсэн юм. Мөн Улсын Их Хурлын гишүүн Л.Соронзонболд нарын 13 гишүүнээс санаачлан өргөн мэдүүлсэн Газрын тосны тухай хуульд өөрчлөлт оруулах тухай болон хамт боловсруулсан хуулийн төслүүдийн хэлэлцэх, эсэх хэлэлцүүлгийг үргэлжлүүлж, үзэл баримтлалын хүрээнд хэлэлцэхийг дэмжлээ

УИХ-ын Эдийн засгийн байнгын хорооны дарга, гишүүд Олон Улсын Валютын Сангийн төлөөлөлтэй санал солилцлоо

УИХ-ын гишүүн, Эдийн засгийн байнгын хорооны дарга Б.Заяабал, УИХ-ын гишүүн Г.Лувсанжамц, Б.Мөнхсоёл нар өнөөдөр /2026.06.12/ Олон Улсын Валютын Сангийн Ази, Номхон далайн газрын хэлтсийн дэд захирал, Монгол Улсыг хариуцсан ажлын хэсгийн ахлагч Тахсин Саади Седик, тус сангийн Монгол дахь Суурин төлөөлөгч Тигран Погосян нарыг хүлээн авч уулзлаа.        Олон Улсын Валютын Сангийн Монгол Улсыг хариуцсан ажлын хэсгээс энэ сарын 10-23-ны өдрүүдэд Улаанбаатар хотноо Дүрмийн IV заалтын дагуу зөвлөлдөх хэлэлцүүлгийг зохион байгуулж байгаа хэмээн танилцуулав. Хэлэлцүүлгийн үр дүнд эдийн засгийн эрсдлийг тодорхойлох ба дунд хугацааны төсөөллийг шинэчлэх, бодлогын зөвлөмж боловсруулах ажээ

Замын хөдөлгөөний аюулгүй байдлын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүдийг эцэслэн батлав

Улсын Их Хурлын 2026 оны хаврын ээлжит чуулганы өнөөдрийн нэгдсэн хуралдаан  10 цаг 01 минутад гишүүдийн 53.2 хувийн ирцтэй эхэлж, 13 асуудал хэлэлцлээ. Хуралдааны эхэнд Монгол Улсын Их Хурлын чуулганы хуралдааны дэгийн тухай хуулийн 29.1-д “Улсын Их Хурлын дарга хууль санаачлагчаас Улсын Их Хуралд өргөн мэдүүлсэн төслийг хэлэлцүүлэгт бэлтгэх Байнгын хороог, хэрэв тухайн төсөл хэд хэдэн Байнгын хорооны эрхлэх асуудлын хүрээнд хамаарахаар бол Зөвлөлтэй зөвшилцөн холбогдох болон бусад Байнгын хороог тогтоож, нэгдсэн хуралдаанд мэдээлнэ.” гэж заасныг хуралдаан даргалагч тодотгоод Улсын Их Хуралд өргөн мэдүүлсэн хуулийн төслүүдийг холбогдох Байнгын хороонд хуваарилсан талаар танилцуулав. Тухайлбал, Улсын Их Хурлын гишүүн Г.Тэмүүлэн нарын 13 гишүүнээс 2026 оны 6 дугаар сарын 10-ны өдөр өргөн мэдүүлсэн Төсвийн тогтвортой байдлын тухай хуульд нэмэлт, өөрчлөлт оруулах тухай хуулийн төслийг Төсвийн байнгын хороонд, Улсын Их Хурлын гишүүн П.Сайнзориг нарын 21 гишүүнээс 2026 оны 6 дугаар сарын 10-ны өдөр өргөн мэдүүлсэн Төрийн албаны тухай хуульд нэмэлт, өөрчлөлт оруулах тухай хуулийн төслийг Төрийн байгуулалтын байнгын хороонд тус тус хуваарилсан. Хуралдаан хуулийн төслүүдийг эцэслэн батлах санал хураалтаар үргэлжлэв

Ерөнхий сайд Н.Учрал “Тэтгэврийн шударга тогтолцооны шинэчлэл”-ийн төслийг УИХ-ын даргад өргөн барилаа

Монгол Улсын Ерөнхий сайд Н.Учрал Нийгмийн даатгалын ерөнхий хуульд нэмэлт, өөрчлөлт оруулах тухай хуулийн төслийг УИХ-ын дарга С.Бямбацогтод өргөн барилаа.  Энэ төслөөр “Тэтгэврийн шударга тогтолцооны шинэчлэл”-ийг хийж, илүү олон жил төлсөн нь илүү өндөр тэтгэвэр авдаг шударга тогтолцоо руу шилжинэ, тэтгэврийн зөрүү арилна, хөдөлмөр эрхлэлтээ дэмжинэ" гэдгийг Монгол Улсын Ерөнхий сайд Н.Учрал мэдэгдсэн.  Тэтгэврийн даатгалын сангийн урт, дунд хугацааны санхүүгийн тогтвортой байдлыг хангах, шимтгэл төлөгчдийн хамрах хүрээг өргөжүүлэх, тэтгэврийн параметрийн болон бүтцийн шинэчлэлийг даатгуулагч, ажил олгогч, тэтгэвэр авагч болон улсын төсөвт үзүүлэх ачааллыг харгалзан аажмаар, зохистой байдлаар үе шаттай хэрэгжүүлэх, залуу үед ирэх санхүүгийн ачааллыг бууруулах тогтолцоог бүрдүүлэх хэрэгцээ, шаардлага нэмэгдэж байна

Гэр бүлийн хөгжлийг дэмжих тухай хуулийн төсөл өргөн мэдүүлэв

Монгол Улсын Их Хурлын дарга С.Бямбацогтод өнөөдөр /2026.06.11/ Улсын Их Хурлын гишүүн, Засгийн газрын гишүүн, Гэр бүл, хөдөлмөр, нийгмийн хамгааллын сайд Т.Аубакир Гэр бүлийн хөгжлийг дэмжих тухай анхдагч хуулийн төсөл өргөн мэдүүлэв.     Монгол Улсад нийт 997 мянга орчим гэр бүл байдаг бөгөөд төрөөс гэр бүлийг бат бөх байлгахад дэмжлэг үзүүлэх зорилгоор хуулийн төслийг боловсруулсан гэдгийг салбарын сайд онцлов

Бизнесийн эрх чөлөөний тухай, Улсын бүртгэлийн ерөнхий хуульд нэмэлт оруулах тухай, Монгол Улсын Хүний эрхийн Үндэсний Комиссын тухай хуульд нэмэлт оруулах тухай хуулийн төслүүдийг хэлэлцэхийг дэмжив

Улсын Их Хурлын өнөөдрийн (2026.06.11) үдээс хойших нэгдсэн хуралдаан 14 цаг 02 минутад эхэлж, Бизнесийн эрх чөлөөний тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх эсэх хэлэлцүүлгийг үргэлжлүүлээ. Үдээс өмнөх хуралдаанаар гишүүд Байнгын хорооны санал, дүгнэлт, хууль санаачлагчийн илтгэл, хууль тогтоомжийн хэрэгцээ, шаардлага, хуулийн төслийн үр нөлөө, зардлын тооцоо болон хуулийн төслийн үзэл баримтлалтай холбогдуулан асуулт асууж, хариулт, тайлбар авсан юм

Орон сууцжуулалтын тухай, Орон сууцны санхүүжилтийн төрөлжсөн банкны тухай хуулийн төсөл өргөн мэдүүлэв

Монгол Улсын Их Хурлын дарга С.Бямбацогтод өнөөдөр /2026.06.11/ Улсын Их Хурлын гишүүн, Хот байгуулалт, барилга, орон сууцжуулалтын сайд Э.Бат-Амгалан Орон сууцжуулалтын тухай, Орон сууцны санхүүжилтийн төрөлжсөн банкны тухай анхдагч хуулийн төсөл өргөн мэдүүлэв. Өнгөрсөн 20 гаруй жилийн хугацаанд зөвхөн барилгын салбарын аж ахуйн нэгжүүдийн нуруун дээр байсан асуудлыг төрөөс зөв бодлогоор дэмжих зорилгоор хуулийн төслүүдийг боловсруулсан гэдгийг салбарын сайд онцлоод, төр, Орон сууцны санхүүжилтийн төрөлжсөн банк, Үндэсний орон сууцны корпорацийн аль нь ч хувийн аж ахуйн нэгжүүдтэй өрсөлдөхгүй гэдгийг тодотгож байлаа.     Орон сууцжуулалтын тухай анхдагч хуулийн төсөл: Улаанбаатар хотод амьдарч буй өрхүүдийн 55.9 хувь буюу 265,802 нь гэр хорооллын бүсэд, дэд бүтцийн шаардлага хангаагүй байшин, гэр, сууцанд амьдарч хотын агаар, хөрсний бохирдлын 75 орчим хувийг бий болгож буй аж. Нөгөө талаас орон сууцны үнийн бүтцэд газар, дэд бүтцийн зардал 18-32, барилгын өөрийн өртөг 40-49, банк, санхүүгийн байгууллагын зээлийн хүүгийн зардал 14-20, хөрөнгө оруулагчийн ашиг 16-30 хувийн нөлөөтэй байгаа юм байна

Чуулганы нэгдсэн хуралдаанаар Бизнесийн эрх чөлөөний тухай хуулийн төслийг хэлэлцэж эхэллээ

Улсын Их Хурлын чуулганы өнөөдрийн /2026.06.11/ үдээс өмнөх нэгдсэн хуралдаан 10.00 цагт 56.3 хувийн ирцтэйгээр эхлэв. Хуралдаанаар хэлэлцсэн эхний асуудал нь Сонгуулийн ерөнхий хорооны гишүүнийг томилох, чөлөөлөх тухай байлаа. Сонгуулийн төв байгууллагын тухай хуульд Сонгуулийн ерөнхий хорооны гишүүний тавыг Улсын Их Хурлын Төрийн байгуулалтын байнгын хороо, хоёрыг Монгол Улсын Ерөнхийлөгч, хоёрыг Улсын дээд шүүх төрийн жинхэнэ албан хаагчдаас санал болгосноор Улсын Их Хурал нэр дэвшигчийн сонсгол хийж зургаан жилийн хугацаагаар томилохоор заасан байдаг бөгөөд Д.Ариунболдыг Сонгуулийн ерөнхий хорооны гишүүнд нэр дэвшүүлсэн Монгол Улсын Ерөнхийлөгчийн саналыг Монгол Улсын Ерөнхийлөгчийн Хот, хөдөөгийн хөгжлийн бодлогын зөвлөх Т.Энхтүвшин танилцууллаа. /Нэр дэвшигч Д.Ариунболдын талаарх мэдээллийг эндээс үзнэ үү/ Сонгуулийн ерөнхий хорооны гишүүнд Д.Мөнхзоригийг нэр дэвшүүлсэн талаар Улсын дээд шүүхийн Тамгын газрын дарга С.Заяадэлгэр танилцуулав

БНСУ-д олон жил ажиллаж, амьдарч байгаа монголчуудыг гэр бүлтэй нь уулзуулах асуудлыг хөндлөө

Парламентад хүний эрхийг ойлгож, дэмждэг гишүүд олон байх тусмаа илүү үр дүнтэй хэмээн УИХ-ын гишүүн, Хүний эрхийн дэд хорооны дарга Х.Баасанжаргал уулзалтын үеэр онцолсон юм. Тэрбээр өнөөдөр (2026.06.11) Монгол Улсад айлчилж байгаа БНСУ-ын Үндэсний Ассамблейн гишүүн, Азийн Хүний эрхийн парламентчдын холбооны ерөнхийлөгч Ким Ги Хён тэргүүтэй зочид, төлөөлөгчидтэй уулзаж, хамтын ажиллагааны санал солилцлоо.    Монгол Улсын Их Хурлын Хүний эрхийн дэд хороо нь хуулийн хэрэгжилтэд түлхүү анхаарч, хянан шалгах чиг үүргээ хэрэгжүүлж байна

УИХ-ын дарга С.Бямбацогт: Хариуцлага, сахилга баттай “Сайн парламент”-ыг төлөвшүүлэхэд УИХ-ын гишүүний зөвлөхүүдийн мэдлэг чадвар, үүрэг оролцоо маш чухал

Улсын Их Хурлын Тамгын газар, Парламентын судалгаа хөгжлийн хүрээлэнгээс Улсын Их Хурлын гишүүний зөвлөхүүдэд парламентын үйл ажиллагаа, гишүүдийн өдөр тутмын ажилд бодит дэмжлэг үзүүлэх, хууль тогтоох процессын талаар суурь мэдлэг олгох, бодлогын дэмжлэг үзүүлэх чадварыг эзэмшүүлэх сургалтыг (2026.06.11) зохион байгуулж байна. Тус сургалтын нээлтэд Улсын Их Хурлын дарга С.Бямбацогт оролцов. Тэрбээр, Улсын Их Хурлын гишүүний зөвлөхийн ажил нь парламентын өдөр тутмын үйл ажиллагааны салшгүй хэсэг бөгөөд гишүүний ажил хэрэг, бодлогын шийдвэр, иргэдтэй харилцах харилцаа, улмаар парламентын нэр хүндтэй шууд холбоотой хариуцлагатай ажил болохыг онцлов

СЕХ-ны гишүүдийг томилох хэлэлцүүлгээс АН-ын бүлэг завсарлага авлаа

Чуулганы эхэнд Сонгуулийн ерөнхий хорооны гишүүнийг томилох, чөлөөлөх тухай асуудал хэлэлцэж байна.  Ерөнхийлөгчөөс Сонгуулийн ерөнхий хорооны гишүүнд нэр дэвшүүлсэн Д.Ариунболд, Дээд шүүхээс нэр дэвшүүлсэн Д.Мөнхзориг, УИХ-ын Төрийн байгуулалтын байнгын хорооноос нэр дэвшүүлсэн ЦЕГ-ын дарга генерал Ж.Болд, Улсын бүртгэлийн ерөнхий газрын дарга Д.Давааням томилох асуудал хэлэлцэж байна.  Томилгоотой холбогдуулан УИХ дахь АН-ын бүлгээс тав хоног завсарлага авах хүсэлт гаргалаа

Ерөнхийлөгчийн тухай хуульд өөрчлөлт оруулах тухай хуулийн төслийн анхны хэлэлцүүлгийг хийв

Улсын Их Хурлын Төрийн байгуулалтын байнгын хорооны өнөөдрийн /2026.06.10/ хуралдаан 13.44 цагт УИХ-ын гишүүн О Алтангэрэл, Ж.Батжаргал, С.Бямбацогт, Б.Жавхлан, Ч.Ундрам, Ө.Шижир, А.Ариунзаяа, Б.Баярбаатар, Л.Гантөмөр, С.Зулпхар, Б.Хэрлэн, Д.Энхтуяа, Б.Батбаатар, Ж.Баярмаа, Т.Доржханд, Л.Мөнхбаатар, Б.Пүрэвдорж нар ирж, 53.1 хувийн ирцтэйгээр эхлэв. Хуралдаанаар хэлэлцсэн эхний асуудал нь Нэр дэвшигчийн сонсголын тов тогтоох, сонсгол даргалагчийг сонгох тухай Байнгын хорооны тогтоолын төсөл байлаа. Сонгуулийн төв байгууллагын тухай хуулийн 4.2 дахь хэсэгт “Хорооны гишүүний тавыг Улсын Их Хурлын Төрийн байгуулалтын байнгын хороо, хоёрыг Монгол Улсын Ерөнхийлөгч, хоёрыг Улсын дээд шүүх төрийн жинхэнэ албан хаагчдаас санал болгосноор Улсын Их Хурал нэр дэвшигчийн сонсгол хийж зургаан жилийн хугацаагаар томилно.” гэж, Монгол Улсын Их Хурлын хяналт шалгалтын тухай хуулийн 30.1.1 дэх заалтад “... Сонгуулийн ерөнхий хорооны ..

Кибер сөрөн тэсвэрлэх тухай хуулийн төслийг анх удаа олон нийтээр хэлэлцүүллээ

Монгол Улсын Их Хурлын гишүүн, Улсын Их Хурлын Инновац, цахим бодлогын хөгжлийн дэд хорооны дарга Ч.Анар тэргүүтэй гишүүдээс санаачлан боловсруулсан Кибер сөрөн тэсвэрлэх тухай хуулийн төслийг өнөөдөр (2026.06.10) олон нийтээр хэлэлцүүллээ. Уг хэлэлцүүлгийг УИХ-ын гишүүн, төсөл санаачлагч Ч.Анар нээж үг хэлэхдээ, улс үндэстний хэмжээнд сөрөн тэсвэрлэх бодлого яагаад чухал болсон талаар онол, практикийн нотолгоонд тулгуурлан тайлбарлаж, хуулийн төслийн хэрэгцээ, шаардлага, олон улсын холбогдох жишгээс танилцууллаа. Сөрөн тэсвэрлэх буюу resilience гэх ойлголт нь анх 2024 онд хувь хүний зайлшгүй эзэмших чадваруудад багтсан бол өдгөө уг жагсаалтын дөрөвдүгээрт эрэмбэлэгдэж байгаа аж.  Олон улсад геополитикийн нөхцөл байдал улам бүр ээдрээтэй болж буйтай зэрэгцэн хиймэл оюун ухаанд суурилсан когнитив дайн хүрээгээ тэлсээр байгаа нь бидний хамгийн том сорилтуудын нэг болсон талаар УИХ-ын гишүүн Ч.Анар ярианыхаа эхэнд дурдлаа

Олон улсын улаан загалмайн хорооны Хууль, эрх зүйн газрын дарга Марва Шаббарыг хүлээн авч уулзлаа

Улсын Их Хурлын гишүүн, Аюулгүй байдал, гадаад бодлогын байнгын хорооны дарга Г.Тэмүүлэн, Улсын Их Хурлын гишүүн, Хууль зүйн байнгын хорооны дарга Д.Цогтбаатар нар өнөөдөр (2026.06.10) Олон улсын улаан загалмайн хорооны Хууль, эрх зүйн газрын дарга Марва Шаббарыг хүлээн авч уулзлаа.   Олон улсын улаан загалмайн хорооны Хууль, эрх зүйн газрын дарга Марва Шаббар уулзалтаар Монгол Улсын олон улсын хүмүүнлэгийн эрх зүйн хэрэгжилтийн өнөөгийн байдлыг үнэлсэн судалгааны тайланг танилцуулав. Энэхүү судалгаанд Монголын улаан загалмай нийгэмлэг, Олон улсын улаан загалмайн хороо дэмжлэг үзүүлсэн бөгөөд Монгол Улсын олон улсын хүмүүнлэгийн эрх зүйн гэрээ, конвенцын хэрэгжилт, үндэсний хууль тогтоомжийн зохицуулалт, институцийн бүтэц, сургалт, сурталчилгаа, олон улсын гэмт хэрэгтэй тэмцэх эрх зүйн орчин, хамгаалалтын тогтолцоо болон зэвсгийн хяналтын асуудлыг цогцоор нь үнэлсэн судалгаа юм.   Тус судалгааны тайланд Монгол Улс олон улсын хүмүүнлэгийн эрх зүйн үндсэн гэрээ, хэлэлцээрүүдэд нэгдэн орсон бөгөөд тэдгээрийн хүрээнд хүлээсэн үүрэг, амлалтаа дотоодын хууль тогтоомж, захиргааны арга хэмжээндээ тусган хэрэгжүүлэх шаардлагатай байгааг дурджээ

Нийгмийн ажлын тухай анхдагч хуулийн төслийг олон нийт, салбарын мэргэжилтнүүд, оролцогч талуудаар хэлэлцүүллээ

Монгол Улсад нийгмийн ажил үйлчилгээний нэгдмэл бодлого, мэргэжлийн уялдаа холбоо, салбар бүрийн эрх зүйн зохицуулалтад хавсарга маягаар тусгагдан, харилцан адилгүй хэрэгжиж байна. Үүний улмаас нийгмийн ажил, үйлчилгээний хүртээмж хангалтгүй байж, хүүхэд, ахмад настан, хөгжлийн бэрхшээлтэй иргэд зэрэг эмзэг бүлгийн эрх ашиг зөрчигдөх эрсдэл өндөр хэвээр байгааг Улсын Их Хурлын гишүүн О.Саранчулуун Нийгмийн ажлын тухай анхдагч хуулийн төслийг танилцуулахдаа онцоллоо. Өнгөрөгч 2025 оны 12 дугаар сарын 07-ны өдөр О.Саранчулуун нарын 24 гишүүн санаачлан Улсын Их Хуралд өргөн мэдүүлсэн уг хуулийн төслийг олон нийтээр хэлэлцүүлж, мэргэжилтнүүд, судлаач нар, оролцогч талуудын санал авах хэлэлцүүлэг өнөөдөр (2026.06.10) боллоо

Төрийн албаны тухай хуульд нэмэлт, өөрчлөлт оруулах тухай хуулийн төслийн талаар хуулийн төсөл өргөн мэдүүлэв

Монгол Улсын Их Хурлын дарга С.Бямбацогтод өнөөдөр /20206.06.10/ Улсын Их Хурлын гишүүн П.Сайнзориг, Н.Алтаншагай, Д.Ганмаа, М.Нарантуяа-Нара нараас Төрийн албаны тухай хуульд нэмэлт, өөрчлөлт оруулах тухай хуулийн төсөл өргөн мэдүүлэв. Улс төрийн албан хаагч нь хэвлэл, мэдээллийн хэрэгслээр болон цахим хуудас, нийгмийн сүлжээний хэрэгслээр төрийн бодлоготой холбоотой асуудлаар албаны болон албан бус байр суурь, улс төрийн үзэл бодлоо илэрхийлэх, улс төрийн нам, эвсэл, нэр дэвшигчийн талаар эерэг, сөрөг мэдээ, мэдээлэл түгээх явдал түгээмэл байгаа бөгөөд энэхүү үйл ажиллагааг төлбөртэйгөөр идэвхжүүлэн түгээх, зарим тохиолдолд төрийн байгууллагын нийгмийн сүлжээний цахим хуудсыг ашиглах явдал нэлээдгүй гарч байгаа аж.   Энэ  нь төрийн үйл ажиллагааг нээлттэй, ил тод болгож, олон нийтэд тайлагнах гэхээсээ илүүтэйгээр хувь хүний сурталчилгаа, зарим тохиолдолд улс төрийн зорилгоор хуурамч мэдээллийг түгээж олон нийтийг төөрөгдүүлж иргэдийн мэдэх эрхийг зөрчих, улс төрийн шударга бус өрсөлдөөнийг нэмэгдүүлж байна гэж үзэж, уг хуулийн төслийг боловсруулсан гэдгийг Улсын Их Хурлын гишүүн П.Сайнзориг онцлов.   Төрийн албаны тухай хуульд Монгол Улсын Их Хурал, Ерөнхийлөгч, аймаг, нийслэл, сум, дүүргийн Иргэдийн төлөөлөгчдийн хурлын сонгуульд нэр дэвшиж хуулиар зөвшөөрөгдсөн сурталчилгааны хугацаанд болон гэмт хэрэг, зөрчил, гамшгаас хамгаалахаас бусад тохиолдолд өөрийн нийгмийн сүлжээнд оруулсан контент, мэдээ, мэдээллээ төлбөртэйгөөр идэвхжүүлэн түгээхгүй байх, энэ зорилгоор төрийн байгууллагын нийгмийн сүлжээний цахим хуудсыг ашиглахгүй байх зохицуулалтыг хуулийн төсөлд тусгасан байна

СЕХ-ны гишүүнд нэр дэвшигчийн сонсголыг 06 дугаар сарын 24-ний өдөр зохион байгуулна

Улсын Их Хурлын Төрийн байгуулалтын байнгын хорооноос Сонгуулийн ерөнхий хорооны гишүүнд нэр дэвшигчийн сонсголыг 2026 оны 06 дугаар сарын 24-ний өдрийн 10.00 цагт Төрийн ордны “Үндсэн хууль” танхимд зохион байгуулах тул иргэн, хуулийн этгээд, хэвлэл мэдээллийн байгууллагуудын төлөөлөл Та бүхнийг оролцохыг урьж байна. Бүртгэл: 2026 оны 06 дугаар сарын 23-ны өдрийн 12:30 цаг хүртэл явагдах тул нэр дэвшигчийн сонсголд оролцох иргэн, хуулийн этгээд, ажиглагч овог, нэр, холбогдох утасны дугаар, нэр дэвшигчдээс асуух асуулт, нэр дэвшигчийн талаарх саналыг бүртгэлийн хуудасны дагуу бөглөж ирүүлнэ үү.         Оролцогчдын талаарх мэдээлэл: Оролцогчдын тоо хязгаартай тул хүсэлт ирүүлсэн дарааллаар баталгаажуулах бөгөөд бүртгэл дуусмагц нэрсийг Улсын Их Хурлын цахим хуудаст байршуулна. Нэр дэвшигчдийн мэдээлэл:      1.Н.МЯГМАР     2.Ц.УРТНАСАН Шуудангийн хаяг: 14201 Улаанбаатар хот, Сүхбаатар дүүрэг, Жанжин Д.Сүхбаатарын талбай 1, Төрийн ордон-333 тоот, Төрийн байгуулалтын байнгын хороо

УИХ-ын дарга С.Бямбацогт Шүүхийн сахилгын хорооны гишүүдтэй уулзлаа

Улсын Их Хурлын дарга С.Бямбацогт өнөөдөр /2026.06.10/ Шүүхийн сахилгын хорооны дарга, гишүүдтэй уулзаж, Шүүхийн тухай болон холбогдох бусад хууль тогтоомжийн хэрэгжилтийн өнөөгийн байдал, Үндсэн хуулиар бий болсон шүүхийн сахилга, хариуцлагын шинэ тогтолцооны үр нөлөө, цаашид хууль эрх зүйн зохицуулалтыг боловсронгуй болгох асуудлаар санал солилцлоо. Уулзалтын үеэр УИХ-ын дарга хууль тогтоох болон шүүх эрх мэдлийн байгууллагууд нь эрх мэдэл хуваарилах зарчмын хүрээнд бие даан ажиллахын зэрэгцээ эрх зүйн орчныг хөгжүүлэхэд эргэх холбоотой, уялдаатай ажиллахын чухлыг онцоллоо

Шүүхийн шийдвэр биелүүлээгүй этгээдэд хүүгийн алданги тооцож, эрүүгийн ял шийтгэл оноох асуудлыг хөндөв

Монгол Улсад иргэний болон арилжааны хэргийн шүүхийн шийдвэр гүйцэтгэлийн үр нөлөөг сайжруулах шинэчлэлийн шаардлага байгааг өнөөдрийн хэлэлцүүлгээр онцоллоо. Шийдвэр гүйцэтгэх албыг мэргэшсэн, чадварлаг болгож төлөвшүүлэх, хувьд шилжүүлэх, шүүхийн шийдвэрээс зайлсхийсэн этгээдэд эрүүгийн ял оноох хүртэл хариуцлагын тогтолцооны реформ хийх асуудлыг “Иргэний шүүхийн шийдвэр гүйцэтгэлийн эрх зүйн орчныг боловсронгуй болгох нь” санал солилцох хэлэлцүүлгийн үеэр хөндөв.     УИХ-ын Хууль зүйн байнгын хороо, Өргөдлийн байнгын хороо Европын сэргээн босголт, хөгжлийн банктай хамтран өнөөдөр /2026.06.10/ зохион байгуулсан уг арга хэмжээг УИХ-ын гишүүн, Өргөдлийн байнгын хорооны дарга О.Номинчимэг, УИХ-ын гишүүн, Хууль зүй, дотоод хэргийн сайд С.Амарсайхан, Европын холбооноос Монгол Улсад суугаа Элчин сайд Ина Марчюлёните, Европын сэргээн босголт, хөгжлийн банкны Монгол дахь төлөөлөгчийн газрын тэргүүн Жахан Шамсиев нар нээж, үг хэлсэн.  Шүүхийн шийдвэр биелэгдэхгүй байна гэдэг нь иргэний эрх хангагдаагүй гэсэн үг