Ирэх сарын 1-нээс гэр хорооллын айл өрхүүдийг цахилгааны шөнийн тарифын хөнгөлөлтөд хамруулна

2017 оноос эхлэн жил бүрийн арваннэгдүгээр сарын 1-нээс Улаанбаатар хотын гэр хорооллын айл өрхүүдийг цахилгаан эрчим хүчний шөнийн тарифын хөнгөлөлтөд хамруулдаг. Энэ журам ирэх сарын 1-нээс мөрдөгдөнө

“Хангарди” шагнал гардуулах ёслол болно

лаанбаатар” олон улсын кино наадмын хүрээнд зохион байгуулагдах “Хангарди” шагнал гардуулах ёслол өнөөдөр /2026.10.22/ болно. Ёслолын үеэр Монголын кино уран бүтээлчдийн шилдэг бүтээл, амжилтыг зургаан төрлөөр шалгаруулж, шагналын эздийг зарлах юм. Монголын Урлагийн Зөвлөлөөс жил бүр зохион байгуулдаг “Улаанбаатар” олон улсын кино наадам энэ сарын 16–22-ны өдрүүдэд Улаанбаатар хотод болж байна

Аюулт үзэгдэл, ослын 129 удаагийн ддудулагаар 12 иргэний амь насыг авран хамгаалжээ

Улсын хэмжээнд өнгөрсөн долоо хоногт (2026.10.12-2026.10.18) нийслэлийн 8 дүүрэг, 20 аймгийн 54 суманд аюулт үзэгдэл, ослын 129 удаагийн дуудлага бүртгэгдсэн байна. Дуудлагын дагуу төв, орон нутгийн Онцгой байдлын байгууллагын алба хаагчид үүрэг гүйцэтгэж, 12 иргэний амь насыг авран хамгаалж, тусламж үйлчилгээ үзүүлж, утаажилтын бүсээс 6 иргэнийг гаргалаа

Ой, хээрийн гал түймэрт нийт 1.016.908 га талбай өртөж, 7.9 орчим тэрбум төгрөгийн хохирол учирсан байна

Он гарсаар улсын хэмжээнд аравдугаар сарын 11-ний өдрийн байдлаар нийслэлийн 2 дүүрэг, 12 аймгийн 63 суманд 172 удаагийн ой, хээрийн гал түймэр бүртгэгдэж, унтраах ажиллагааг зохион байгууллаа. Энэ нь өмнөх оны мөн үетэй харьцуулахад 36.2 хувиар буурсан үзүүлэлттэй байгаа ч нийт түймрийн 77 хувь буюу 134 нь хээрийн түймэр байна. Ой, хээрийн гал түймрийн аюулаас 4950 гэр, 25 өвөлжөө, хашаа саравч, 8 автомашиныг авран хамгаалж, 3 айл өрхийн 8 иргэн, 3760 орчим малыг нүүлгэн шилжүүллээ. Харин ой, хээрийн гал түймэрт 1 иргэн өртөж нас барж, 2 иргэн түлэгдэж, 12 гэр, 2 байшин, 6 өвөлжөө, 38 хашаа саравч, 6 автомашин техник, 131 бод, 1012 бог мал өртөж, урьдчилсан байдлаар нийт 1.016.908 га талбай өртөж, 7.9 орчим тэрбум төгрөгийн хохирол учирсан байна

Өнөөдөр Энгелсийн гудамжны замыг хэсэгчлэн хаана

Хан-Уул дүүргийн гуравдугаар хорооны Энгелсийн гудамжинд аравдугаар сарын 10, 11-нд хэсэгчилсэн засвар, шинэчлэлтийн ажил хийнэ. Үүнтэй холбоотойгоор замын хөдөлгөөнийг амралтын өдрүүдэд хэсэгчлэн хаахаар болжээ. Тодруулбал, өнөөдөр буюу аравдугаар сарын 10-ны 08:00-22:00 цагийн хооронд замын зүүн талын урсгалыг хаана

Хэрэглээний бараа, үйлчилгээний үнэ өмнөх оны мөн үеэс 12.9 хувиар өслөө

Улсын хэмжээнд хэрэглээний бараа, үйлчилгээний үнэ энэ оны 9 дүгээр сард өнгөрсөн оны мөн үеийнхээс 12.9, өмнөх сарынхаас 0.6 хувиар нэмэгджээ.   Үндэсний статистикийн хорооны мэдээлснээр, энэ оны 9 дүгээр сард бараа, үйлчилгээний үнийг өнгөрсөн оны мөн үеийнхтэй харьцуулахад барааны бүлгийнх 13.5, үйлчилгээний бүлгийнх 11.2, хүнсний бүлгийнх 20.8, хүнсний бус бүлгийн үнэ 10 хувиар нэмэгдсэн байна.   Инфляцын түвшин 2025 оны 9 дүгээр сард 9 хувь байсан бол энэ оны 9 дүгээр сард 12.9 хувь болсон. Үүнд бензин, түлшнээс бусад импортын барааны үнэ 2 нэгж, мах, хатуу түлшнээс бусад дотоодын барааны үнэ 4.4 нэгж хувиар өссөн нь нөлөөлжээ

Монгол Улсаас ОХУ-д суугаа Элчин сайдын яамнаас сэрэмжлүүлэг гаргажээ

ОХУ-ын Эрхүү хот дахь Сибирь, Алс Дорнодын тарваган тахал эсэргүүцэн судлах эрдэм шинжилгээний хүрээлэнгийн 28 настай лаборант нас барсантай холбоотой тарваган тахлын халдвар авсан байж болзошгүй гэх мэдээлэл аравдугаар сарын 2-ноос ОХУ болон дэлхийн хэвлэл, мэдээллийн хэрэгслээр тархсантай холбогдуулан Монгол Улсаас ОХУ-д суугаа Элчин сайдын яамнаас сэрэмжлүүлэг гаргажээ.   Сэрэмжлүүлэгт ОХУ-ын тус бүс нутагтай ойролцоох хот, тосгон, нэн ялангуяа Эрхүү мужид зорчиж буй болон зорчихоор төлөвлөж буй иргэд өөрсдийн эрүүл мэнд, эрүүл ахуй, аюулгүй байдлыг сайтар хангахыг зөвлөжээ. Хэрэв тухайн бүс нутагт зорчих үед таны биеийн байдал эвгүйрэх, эсхүл хэвийн бус болох тохиолдолд байгаа газраа үлдэж, хамгийн ойролцоох эрүүл мэндийн байгууллагад 103 болон 112 дугаарын утсанд дуудлага өгч, эрүүл мэндийн үйлчилгээг авах боломжтой аж.   Иргэд ОХУ-ын хилээр нэвтрэх үед, түүний дараа эрх зүй, эрүүл мэнд болон бусад асуудлаар яаралтай зөвлөмж, туслалцаа шаардлагатай тохиолдолд өөрт ойр Монгол Улсаас ОХУ-д суугаа Дипломат төлөөлөгчийн газруудын аль нэгэнтэй дараах шуурхай утас болон цахим шуудангаар 24 цагаар холбогдох боломжтойг сэрэмжүүлэгт дурджээ.   Москва хот Холбогдох газар: Монгол Улсаас ОХУ-д суугаа Элчин сайдын яам Холбоо барих: +7 495 690 67 92, moscow@mfa.gov.mn ЭСЯ-ны Консулын хэлтэс: +7 499 241 15 48, mongolconsul@gmail.com Кызыл хот Кызыл хотод суугаа Ерөнхий консулын газар +7 3942220430, Kyzyl@mfa.gov.mn Эрхүү хот Эрхүү хотод суугаа Ерөнхий консулын газар +7(395) 2342145, irkutsk@mfa.gov.mn Улаан-Үд хот Улаан-Үд хотод суугаа Ерөнхий консулын газар +7 (3012) 22-04-99, ulan-ude@mfa.gov.mn хаягаар холбоо барина.    2014 оны арваннэгдүгээр сарын 14-ний өдрөөс Монгол Улс, ОХУ-ын иргэд 30 хүртэл хоног харилцан визгүй зорчих нөхцөл хэрэгжиж байгаа юм

Баавгай айл руу дайрч нэг хүн барьж, нэг хүнийг шархдуулжээ

Баянзүрх дүүргийн 35 дугаар хорооны нутаг дэвсгэр, Хужир буланд баавгай айл руу орж, хүний аминд хүрсэн хэрэг гарчээ. Тодруулбал, суурин газраас алслагдмал орших айлд баавгай орж, 40 гаруй насны эрэгтэйг дайрч, амь насыг нь хохироосон байна

Нийслэлийн 13 байршилд гал түймрийн аюулыг эрт илрүүлэх өндрийн камер байршуулжээ

 Нийслэлийн Онцгой байдлын газрын Шуурхай удирдлага, зарлан мэдээллийн төвийг  орчин үеийн технологид тулгуурлан иж бүрэн тоноглож, гамшиг, ослын дуудлага, мэдээллийг шуурхай хүлээн авах, нөхцөл байдлыг нэгтгэн боловсруулах, холбогдох байгууллагуудын үйл ажиллагааг уялдуулан зохицуулах боломжийг бүрдүүллээ.  Энэ хүрээнд нийслэлийн хэмжээнд гал түймрийн аюулыг эрт илрүүлэх зориулалт бүхий өндрийн камерыг 13 байршилд суурилуулсан бөгөөд алслагдсан Багахангай, Багануур, Налайх дүүрэг багтаж байна. Өндрийн камер нь хиймэл оюун ухаанд суурилсан технологийн тусламжтайгаар галын дөл, утааг алсын зайнаас бодит цагийн горимоор илрүүлж, 10 километр хүртэлх радиуст гал түймрийн аюулыг мэдрэх боломжтой

Иргэд бензиний хомсдолыг эсэргүүцэн төв талбайг автомашинтайгаа тойрон жагсаж байна

Өнөө өглөө 10:00 цагаас эхлэн иргэд бензиний хомстлыг эсэргүүцэн төв талбайг автомашинтайгаа тойрон жагсаж байна.  Энэ жилийн  зургаадугаар сарын сүүлээр улсын хэмжээнд ойролцоогоор 40 хоногийн нөөцтэй байсан ч долдугаар сард нийлүүлэлт 40%-иар буурсан. Улмаар долдугаар сарын сүүлээс наймдугаар сарын дунд үе хүртэл хомсдол орон даяар үргэлжилсэн билээ